ఈ రోజుల్లో ఓ స్టార్ హీరో సినిమా మొద‌లవ్వాలంటే ఆ హంగామానే వేరు. ర‌చ్చ రంబోలా అవుతుందంతే. కానీ కొంద‌రు మాత్రం త‌మ సినిమాల‌ను చాలా అంటే చాలా సెలెంట్ గా మొద‌లుపెట్టేస్తుంటారు. ఇప్పుడు అజిత్-శివ కూడా అంతే. ఇప్ప‌టికే మూడు సినిమాలు చేసారు.. వెంట‌నే గ్యాప్ ఇవ్వ‌కుండా నాలుగో సినిమాకు ముహూర్తం పెట్టారు. పెద్ద‌గా హ‌డావిడి లేకుండానే డిసెంబ‌ర్ 8న చెన్నైలోని త‌న ఆఫీస్ లో సినిమాకు ముహూర్తం పెట్టేసాడు ద‌ర్శ‌కుడు శివ. అయినా ఓ ద‌ర్శ‌కున్ని గుడ్డిగా న‌మ్మ‌డం అంటారు క‌దా.. ఇప్పుడు శివ విష‌యంలో అజిత్ ఇదే చేస్తున్నాడు. అరె.. మిగిలిన ద‌ర్శ‌కులంతా అజిత్ కోసం వేచి చూస్తుంటే ఆయ‌న మాత్రం శివ‌తోనే సినిమాలు చేస్తానంటూ కూర్చుంటున్నాడు. ఏం మాయ చేసాడో.. ఏం మందు పెట్టాడో కానీ అజిత్ పూర్తిగా శివ మాయ‌లో ప‌డిపోయాడు. ఆ ద‌ర్శ‌కుడు ఏం చెబితే అది చేస్తున్నాడు అజిత్. ఓ హీరోకు ద‌ర్శ‌కుడు ఇంత బాగా క‌నెక్ట్ కావ‌డం ఈ మ‌ధ్య కాలంలో ఇదే తొలిసారి.
అస‌లు ప‌క్క ద‌ర్శ‌కుల‌ను ప‌ట్టించుకోకుండా కేవ‌లం ఆయ‌న‌తోనే సినిమాలు చేస్తున్నాడు అజిత్. మూడేళ్ల కింద అజిత్ తో వీర‌మ్ చేసి సూప‌ర్ హిట్ అందుకున్నాడు శివ. తెలుగులో శౌర్యం, శంఖం, ద‌రువు లాంటి సినిమాలు చేసిన శివ.. త‌మిళ‌నాట సిరుత్తైతో పాపుల‌ర్ అయ్యాడు. ఆ త‌ర్వాత అజిత్ వీర‌మ్ తో గుర్తింపు తెచ్చుకున్నాడు. అది మొద‌లు అజిత్ కు ఫ్యాన్ అయ్యాడు.. ఆ త‌ర్వాత ట్యూన్ అయ్యాడు. వ‌ర‌స‌గా ఆయ‌న‌తోనే సినిమాలు చేస్తున్నాడు. వీర‌మ్ అయిపోయింది.. వేద‌లం అయిపోయింది.. ఈ మ‌ధ్యే వివేగం కూడా అయిపోయింది. ఇది ఫ్లాపైంది. అయినా కానీ ఇప్పుడు నాలుగోసారి శివ‌తోనే సినిమాకు రెడీ అయ్యాడు అజిత్. ఈ కాంబినేష‌న్ కు మ‌రో ప్ర‌త్యేక‌థ కూడా ఉంది. వీళ్లు కేవ‌లం వి అనే అక్ష‌రంతోనే టైటిల్స్ పెట్టుకుంటారు పైగా చివ‌ర్లో సున్నా ఉంటుంది. వీర‌మ్.. వేదాలం.. వివేగం.. ఇప్పుడు విశ్వాసం అంటూ వ‌స్తున్నారు అజిత్, శివ. వీళ్ల‌ను చూస్తుంటే క‌థ కంటే ముందు టైటిల్ బాగుంటే చాలు అనుకుంటున్న‌ట్లు క‌నిపిస్తుంది. మ‌రి వివేగంతో అజిత్ కు షాక్ ఇచ్చిన శివ.. ఈ సారి ఏం చేస్తాడో..?
